दरभंगा-पटना हवाई सेवा : 3 क जगह 10 सीटर विमान उड़त


दरभंगा । दरभंगा स पटना क बीच हवाई सेवा क बाट ताकि रहल लोक लेल खुशीक समाद। देर आये दुरुस्त आये क कहावत कए चरितार्थ करैत स्प्रीट एयर लाइन रांची आब तीन क जगह टेन सीटर विमान अनबाक घोषणा केलक अछि। एकरा लेल ऑस्ट्रेलिया क एकटा कंपनी स भाड़ा पर विमान लेबाक प्रयास चलि रहल अछि। स्प्रीट एयर लाइन क पटना एयर पोर्ट मैनेजर सुरेश प्रसाद कहलथि अछि जे ऑस्ट्रेलिया क कंपनी स गप अंतिम दौर मे अछि। उम्मीद अछि जे एहि माह मे सब किछु तय भ जाइत आ अगिला माह विमान उपलब्ध भेला पर तिथि घोषित करि देल जाएत। उल्लेखनीय अछि जे नव सेवा कई मायने मे फायदेमंद साबित भ सकैत अछि। तीन क जगह 10 यात्री कए लकए उड़ान भरला स विमान किराया कम लागत, आ पटना क अलावा महानगर क लेल सेहो सेवा आरंभ हेबाक संभावना बढ़त। यात्री कए सामान लकए चलबा मे सेहो सहूलियत होएत। बता दी जे विगत 14 सितंबर स शुरू होइवाला इ सेवा पहिले दिन लैंड करबा कान विमान कए रनवे स फिसली जेबाक कारण स रद्द करि देल गेल अछि। एकर बाद लोक एहि सेवा कए लकए नाउम्मीद भ चुकल छल। महाराज दरभंगा क दरभंगा एयरलाइंसक बाद इ पहिल मौका छल जखन कोनो निजी कंपनीक सेवा दरभंगा हवाई अड्डा स शुरू हुए जा रहल अछि। इ सेवा दरभंगा क संग-संग रांची, गया, पूर्णिया, भागलपुर, सहरसा क लेल सेहो आरंभ भ रहल अछि। कहल जा रहल अछि जे दरभंगाक बाद मुजफ्फरपुर स इ सेवा शुरू होएत। हालांकि मुजफ्फरपुर जिला प्रशासन क दिस स हवाई अड्डा कए उड़ान लायक बनेबा लेल आहूत बैठक बेर-बेर टलला स स्प्रीट एयर लाइन तारीख बतेबा मे असमर्थ अछि। पटना एयर पोर्ट मैनेजर श्री प्रसाद कहैत छथि जे अगर मुजफ्फरपुर क एयर पोर्ट दुरुस्त भ जाए त सीधा कोलकाता, मुंबई क लेल सेहो सेवा शुरू करबा क विचार अछि।

नीक वा अधलाह - ज़रूर कहू जे मोन होय

comments