दरभंगा टावर कए भेटत नव जीवन

2
22
esamaad maithili newspaper

दरभंगा । जिला प्रशासन आ नगर निगम प्रशासन क संयुक्त प्रयास स 15 जून क बाद दरभंगा टावर आ बेंता चौक पर गाडी ढार करब प्रतिबंधित करि देल गेल अछि। एहि कार्रवाई स एक दिस जतए टावर कए नव जीवन भेटत ओतहि लोक कए जाम स निजात भेट जाएत। डीएम आर लक्ष्मणन आ एसएसपी गरिमा मल्लिक क स्वीकृति क बाद नगर आयुक्त केबीएन सिंह एकरा लेल तैयारी शुरू क देलथि अछि।
श्री सिंह क अनुसार दरभंगा टावर क दक्षिण सुभाष चौक तक, पूरब भगत सिंह चौक आ उत्तर गणेश मंदिर आ सुदर्शन पेट्रोल पंप तक नो पार्किग जोन घोषित कैल गेल अछि। एहि परिसर मे भोर 9 स राति 9 बजे तक कोनो प्रकार क वाहन (दुपहिया बा चारि पहिया) कए प्रवेश नहि भेटत। वाहन मालिक अपन वाहन कए हसनचक स्थित पार्किग स्थल या अन्यत्र रखताह। नो पार्किग जोन मे वाहन लगेबा पर पुलिस लाइन क क्रेन मशीन ओकरा खींचकए थाना आनि लेत। जतए स जुर्माना भरलाक बाद गाड़ी छूटत। नो पार्किग जोन मे वाहन क संग प्रवेश करबा स रोकबा लेल भगत सिंह चौक, सुभाष चौक आ हसनचक पर स्थायी रूप स ट्राफिक पुलिस क पहिल बेर प्रतिनियुक्ति कैल जा रहल अछि। बेंता चौक पर सेहो एकरा सख्ती स लागू कैल जाएत। बेंता चौक क उत्तर मे स्थित तरकारी बाजार कए स्थानांतरित क ओहि ठाम टेंपो स्टैंड बनाउल जा रहल अछि। दुर्गा मंदिर क उत्तर डॉक्टर्स कॉलोनी क गेट तक स्थल कए विकसित क तरकारी बाजार बनाउल जा रहल अछि। बेंता चौक स उत्तर सफी मुसलिम स्कूल स कर्पूरी चौक तक मुख्य सड़क क पश्चिमी भाग मे वाहन क पड़ाव स्थल बनाउल जा रहल अछि। जिला प्रशासन बेंता चौक स एलआर गल्र्स स्कूल तक नो पार्किग जोन घोषित क देलक अछि। देखबाक चाही जे नगर निगम आ जिला प्रशासन अपन एहि फैसला कए कोना लागू करैत अछि। अगर एहि फैसला कए लागू करि देल जाइत अछि त इ दरभंगा शहर कए व्‍यवस्थित करबा दिस एकटा पैघ डेग कहल जाएत।

maithili news, mithila news, bihar news, latest bihar news, latest mithila news, latest maithili news, maithili newspaper

Comments

comments

2 COMMENTS

  1. Darbhanga-Laherisarai beech tempo lel one way traffick par bichar hebak chahee taki lok ke dikkat nahi ho. etekmlamba one way traffic kathu shayde hoit chhaik.

Comments are closed.