दरभंगा क दामिनी आ गलहोत क चिंता

कुमुद सिंह
वाकई राजस्‍थान क गलहोत सरकार पर जयपुर हाइकोर्ट क टिप्‍पणी सटीक छल। महिला उत्‍पीडन मामला मे गलहोत सरकार सुशासनक मानक स्‍थापित क रहल अछि। गलहोत दरभंगाक दामिनी लेल घटनाक करीब 130 दिन बाद अचानक चिंतित भ गेलाह। दरभंगाक दामिनी लेल मुख्‍यमंत्री गलहोत कए आश्‍वासन देबा मे 130 दिन लागि गेल। आश्‍वासन सेहो बस पीडिता क परिवार क सुरक्षा क आश्‍वासन। दामिनी क गुनहगार एखनो जेल स बाहर अछि। राजस्‍थान सरकार ओकरा पकडबा स बेसी ओकरा बचेबा लेल चिंतित अछि। इ आश्‍वास सेहो ओहि जनदबाव क कारण देल गेल जाहि स गलहोत लेल आरोपी कए बचायब आब मुश्किल भ रहल अछि। यैह कारण अछि जे एक दिस जतए पूरा देश दुष्‍कर्मी कए फांसी क मांग क रहल अछि, ओतहि गलहोत दुष्‍कर्मी कए जेल पढेबा क बदला मे पीडिता क परिवार कए सुरक्षा देबाक आश्‍वासन द मामला कए शांत करबाक प्रयास मे लागल छथि। ज्ञात हुए जे भंवरी देवी कए तकबा काल राजीव नहर स बरामद 32 टा युवतीक नरकंकाल मामला कए सेहो गलहोत एहिना आश्‍वासन क चादर मे लपेट रखने छथि।
गलहोत सरकार क संरक्षण जगजाहिर अछि ताहि लेल गुनहगार कए एहि बेर सेहो अपन आका पर पूरा भरोस अछि। ओकरा कोनो चीज क डर नहि अछि, ओकर दिस स दामिनी क बहिन कए भेट रहल धमकी बता रहल अछि जे सरकारी संरक्षण क बल पर ओ आगू सेहो अपन मनमर्जी क सकैत अछि। गलहोत जाहि प्रकार स गुनहगार कए बचेबा मे लागल छथि ओहि स आशंका प्रबल अछि जे गुनहगार पहिने त ‘दरभंगा क दामिनी’ क जिनगी कए नोचलक आ आब ओकर छोट बहिन आ ओकर परिवार संग सेहो किछु क सकैत अछि। दरिंदा धमकी द रहल अछि जे पुलिस ओकर किछु नहि क सकैत अछि। पुलिस एहि धमकी कए एतबा गंभीरता स लेलक अछि जे एखन धरि फोन आ पता ओकरा लग नहि अछि।
जनदबाव क आगू राजस्थान सरकार जगबाक दावा केलक अछि, मुदा गुनहगार कए पडकबाक कोनो आश्‍वासन देबाक बदला मे मुख्यमंत्री अशोक गहलोत पीड़िता क परिवार कए सुरक्षा क आश्वासन देलथि अछि। 130 दिन मे 12 टा पैघ-छोट ऑपरेशन क बाद गलहोत कए इ चिंता भेल जे पीडिता क केहन इलाज भ रहल अछि आ ओ आब जा कए ओकर परिवार कए कहलाह अछि जे जरूरत भेला पर दरभंगाक दामिनी कए सेहो बलिया क दामिनी जेकां विदेश पठाउल जा सकैत अछि। सरकारी आश्वासन क बाद अगर अहां इ सोचि रहल छी जे हालात मे कोनो अंतर भेल होएत त इ भ्रम अछि। जयपुर क जेकेलोन हास्पिटल मे जिनगी लेल जूझ रहल ‘दरभंगा क दामिनी’ क देखरेख मे जुटल ओकर 17 सालक बहिन कए सरकारी संरक्षण मे नुकायल दरिंदा सब एखनो धमका रहल अछि। आरोपी साफ तौर पर कहि रहल अछि जे चुपचाप इलाज करा नहि त मुंह खोलबा पर राजस्‍थान स वापस नहि जा सकैत छैं। कई बेर फोन एला क बावजूद जयपुर पुलिस गरैय माछ पकडबाक प्रयास क रहल अछि। ओकर परिवार कोनो अनहोनी क आशंका स सहममल जरूर अछि मुदा हिम्‍मत स जयपुर मे न्‍याय लेल जंग जारी रखने अछि। दरिंदा सब साफ तौर पर अपन पहुंच क दावा क रहल अछि। सरकारी संरक्षणक पोल एहि स सेहो खुलैत अछि जखन आरोपी अपन ‘पैघ कनेक्शन’ क बल पर जेल नहि जेबाक दावा क रहल अछि आ सरकार महज पीडिताक परिवार कए सुरक्षाक आश्‍वासन द रहल अछि। ज्ञात हुए जे ‘दरभंगा क दामिनी’ कए नोचनिहार छहटा दरिंदा मे स मुख्‍य आरोपी समेत चारिटा एखनो सरकारी संरक्षण मे अछि। दू गोटे कए जेल पहुंचा सरकार ओकरो जमानत पर जेल स बाहर करबाक काज संपन्‍न क चुकल अछि। पुलिस सब किछु जनैत सरकार क आगू लाचार अछि।
‘दरभंगाक दामिनी’ क बहिन धमकी क गप विस्तार स जयपुर मे पुलिस क सामने बता चुकल छथि। दरभंगाक माटी क इ ताकत अछि जे तीनटा बहिन आ माई दरभंगाक जयपुर मे न्याय क जंग लडबा लेल जमल अछि। परिवार कोनो धमकी क बाद विचलित नहि अछि। देखबाक चाही जे पुलिस सरकारी संरक्षण मे नुकायल आरोपी कए कहिया जेल तक पहुंचेबाक हिम्‍मत जुटा पबैत अछि?
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna, दरभंगा, मिथिला, मिथिला समाचार, मैथिली समाचार, बिहार, मिथिला समाद, इ-समाद, इपेपर

नीक वा अधलाह - ज़रूर कहू जे मोन होय

comments