दरभंगा कए लजा देलक बेल्जियम क छात्र

0
3

विजय/ वरूण

दरभंगा। बेल्जियम क डेनियम फाउंडेशन क माध्‍यम स दरभंगा आयल छात्र डीएमसीएच क टीबी डीसी वार्ड मे बनि रहल इंटर मिडिएट रिफयार्स लैब मे श्रमदान क पूरा शहर कए अपना दिस आकर्षित क लेलथि अछि। विदेश स आयल इ छात्र सब 12वीं कक्षा क छथि। बेल्जियम क इ छात्र सब केवल एहि ठाम श्रमदान नहि क रहल छथि बल्कि एहि दल क सदस्‍य डेनियम फाउंडेशन क छत्रछाया मे एहि केंद्र लेल 1 करोड़ 80 लाख टका सेहो जुगाड केलथि अछि। इ अर्थ संग्रह इ छात्र सब अपन देश मे क एहि ठाम दान देल‍थि अछि आ अर्थदान क संग-संग श्रमदान सेहो द रहल छथि। एहि स डीएमसीएच क टीबीडीसी वार्ड मे राज्‍यक दोसर पैघ अत्याधुनिक प्रयोगशाला बनि सकत। एहि प्रयोगशाला कए बनला स एहि इलाका क टीबी रोगी कए बहुत सुविधा भेटत। कुल 12टा छात्र-छात्राक इ दल बेल्जियम स एक सप्‍ताह लेल दरभंगा आयल अछि। हिनक कहब अछि जे श्रमदान आ एहन क्षेत्र लेल फंड जुटायब हिनकर शिक्षाक महत्वपूर्ण हिस्सा अछि। दलक सदस्‍य एस माइकल कहला जे डब्लूएचओ क रिपोर्ट क अनुसार दरभंगा मे टीबी रोगी क संख्या काफी बेसी अछि। एहि ठाम कैट वन आ टू क दवाई स इलाज नहि भ पाबि रहल अछि। एहन मे अगर एहि ठाम हमर सबहक सहयोग स इ लैब बनि जाएत त इलाज संभव भ सकत। एहि लैब क निर्माण क बाद एहि ठामक मरीज कए इलाज लेल अन्य प्रदेश जेबाक जरूरत नहि रहत। माइकल उम्‍मीद दैत कहला जे इ लैब दरभंगा कए टीबी रोग स मुक्त क देत।
टीबीडीसी वार्ड मे एहि छात्र सब कए सीमेंट-गारा आ ईंट ढोइत देख कए दरभंगा क लोक आश्चर्य चकित भ रहल अछि। केतबा पैघ विडम्बना अछि जे अध्ययन क दौरान श्रम क महत्ता बतानिहार हमार भारतीय शिक्षा प्रणाली अपन देश मे आब समाप्त भ चुकल अछि। खास कए दरभंगा मे त इ इतिहासक पन्‍ना मे नुका गेल अछि। पुरानी पीढी क लोक क कहब अछि जे आजादी क बाद तक दरभंगाक राज स्‍कूल आ किछु आओर स्‍कूल मे छात्र लेल श्रमदान आ हस्तकला शिक्षा क महत्‍वपूर्ण आ अनिवार्य हिस्‍सा छल। स्‍कूल क कक्षा क सफाई क जिम्‍मा छात्र सब पर छल। झाडू, टोकरी, चटाई छात्र अपन हाथ स बनबैत छल। स्‍कूल छात्र सब कए खेती करबा लेल गाम सेहो ल जाइत छल। बाँध मरम्‍मत, सड़क मरम्मत सन काज सेहो छात्र श्रमदान क करैत छलाह। मुदा आइ शिक्षा क मतलब बदलि चुकल अछि। भारतीय शिक्षा प्रणाली स प्रेरणा लकए विदेशी छात्र-छात्रा जखन हमर घर मे श्रमदान करबा लेल अबैत छथि त हम हुनका देख चकित होइत छी, हमर बीचक किछु लोक हुनका देख हंसैत छथि मुदा एक आदमी हमर सबहक बीच मे एहन नहि छथि जे हुनका संग हाथ मिला कए श्रमदान क सकथि। सात समुन्दर पार स भारतीय संस्कृति क लुप्त भ चुकल सुगंध स दरभंगा कए एक बेर फेर सराबोर करबा लेल आयल बेल्जियम क एहि छात्र-छात्रा क जज्‍बा कए इ’समाद परिवार दिस स नमन।

maithili news, mithila news, bihar news, latest bihar news, latest mithila news, latest maithili news, maithili newspaper

Please Enter Your Facebook App ID. Required for FB Comments. Click here for FB Comments Settings page