तीनटा थर्मल परियोजना लेल कोल लिंकेज क आसार बढ़ल


पटना। ऊर्जा विभाग लखीसराय क कजरा मे 1980 मेगावाट, भागलपुर क पीरपैंती मे 1980 मेगावाट आ बक्सर क चौसा मे एतबे क्षमताक थर्मल परियोजना लगेबाक प्रयास मे अछि। एहि परियोजना क लेल सरकार जमीन क व्यवस्था करि लेने अछि, मुदा कोल लिंकेज नहि भेटबा स आगूक काज ठमकल अछि। हाल मे केंद्रीय ऊर्जा मंत्रीक संग भेल राज्य सरकारक बैठक मे कोल लिंकेजक लेल बाट खुलबाकआसार बढ़ल अछि। ऊर्जा विभागक पदाधिकारी क कहब अछि जे सरकार थर्मल क तीनू परियोजना लेल भूमि आ जल उपलब्ध करा देलक अछि आ एकर सूचना केन्द्रीय ऊर्जा मंत्रालय कए पठा देलक अछि। आब कोल लिंकेज देबा मे कोनो बाधा नहि रहल। ज्ञात हुए जे केन्द्रीय ऊर्जा मंत्री सुशील कुमार शिंदे बिहार क ऊर्जा समस्या पर वार्ता क दौरान ऊर्जा मंत्री रामाश्रय प्रसाद सिंह कए कहने छलाह जे जाहि थर्मल परियोजना क लेल कोल लिंकेज क मांग क रहल छी, पहिने ओकरा लेल जमीन आ पाइन उपलब्ध करेबा क व्यवस्था करू। एहि लेल सम्बन्धित मंत्रालय क अनापत्ति मांगल गेल छल।
ओ कहलथि जे पहिने तीनू कए गंगा स पाइन उपलब्ध करेबाक योजना छल, मुदा जल संसाधन विभाग एकरा लेल नहर क माध्यम स पाइन देबाक व्यवस्था केेलकअछि।
समस्या क निदान क लेल ऊर्जा विभाग केन्द्र कए दू टा अलग-अलग पत्र पठेलक अछि। पहिलपत्र मे कहल गेल अछि जे परियोजना क स्थापना क लेल भूमि क संकट नहि अछि। परियोजना क आवश्यकता अनुसार पाइन सेहो उपलब्ध रहत। परियोजना कए पाइन उपलब्ध करेबा लेल केन्द्रीय जल आयोग क अनापत्ति प्राप्त नहि भेल अछि, मुदा राज्य सरकार लेल इ आवश्यक नहि अछि। ऊर्जा विभाग क अनुसार कोल लिंकेज प्रदान करेबा लेल अलग प्रक्रिया अछि। एकरा लेल बनल समिति क बैठक मे मंजूरी पर निर्णय होइत अछि। कोल लिंकेज क लेल प्रस्तावित तीनू थर्मल प्रतियोगिता बोली क आधार पर कोयला आधारित मेगा पावर परियोजना क लेल अछि। एकरा लकए राज्य सरकार, बिहार राज्य विद्युत बोर्ड आ आईएलएफएस क संयुक्त उपक्रम बिहार पावर इन्फ्रास्ट्रक्चर कम्पनी प्रा. लि. स्थान क चयन केेलक अछि।

नीक वा अधलाह - ज़रूर कहू जे मोन होय

comments