तिवारीक आरोप स सहमल शिक्षा विभाग

पटना । जदयू क राष्ट्रीय प्रवक्ता आ सांसद शिवानंद तिवारी क आरोप अछि जे कुलपति क नियुक्ति मे सौदेबाजी भ रहल अछि। एहि दिशा मे आवश्यक कदम उठेबाक लेल शिक्षा मंत्री पीके शाही कए पत्र लिखला अछि।
पत्र मे तिवारी साफ कहला अछि जे इ राज्य मे शिक्षा क विकास आ नीतीश सरकार दूनू लेल नीक नहि अछि। ओ कहला अछि जे उच्च शिक्षा स जुड़ल लोक क कहब अछि जे कुलपति क नियुक्ति मे टकाक पैघ पैमाना पर लेनदेन भ रहल अछि। एकटा विश्वविद्यालय मे एहन सज्जन कए कुलपति बनाउल गेल जिनका पर निगरानी विभाग जांच करि रहल अछि। एहि मास सेहो किछु नियुक्ति हेबाक अछि जाहि लेल सौदाबाजी फर शुरू भ गेल अछि। तिवारी कहला-शिक्षक क नियुक्ति मे सेहो पूर्व मे गड़बड़ी होइत रहल अछि। 2003 मे विवि शिक्षक क नियुक्ति मे शैक्षणिक योग्यता कए गौण रखल गेल छल। योगदान पत्र नहि लिख सकनिहार कए पटना विश्वविद्यालय क शिक्षक बना देल गेल। ओ कहला जे शिक्षक नियुक्ति कए लकए सेहो पारदर्शी आ प्रभावी व्यवस्था लागू हेबाक चाही। सवाल उठैत अछि जे कुलपतिक नियुक्ति राज्यपाल सरकारक सलाह स करैत अछि आ शिक्षक नियुक्ति क नियमावली सेहो सरकारक बनाउल अछि, एहन मे तिवारीक आरोप गंभीर आ इ बतेबा लेल काफी अछि जे सरकार क शिक्षा विभाग एकटा धनवानक हाथ मे किया देल गेल। ओना तिवारीक खत क बाद शिक्षा विभाग सक्रिय भेल आ राज्यपाल स समय मंगलक अछि जे कुलपतिक नियुक्तिक मामला मे गंभीर चर्चा भ सकए, दोसर दिस कुलपति कए साफ निर्देश देल गेल अछि जे अगिला सूचना तक कोनो शिक्षकक नियुक्ति रोकि देल जाए। कहल जा रहल अछि जे विधानसभाक अगिला सेसन मे एकरा लेल एकटा आयोग बनेबा लेल बिल आनल जाएत। बहरहाल, जे हुए विपक्षक चुप्पीक बीच शिवानंद जीक इ खत सरकारक काजधाज कए जनताक सामने अनबा मे अपन योगदान देलक। आशा कैल जाए सरकार अपन एहि कलंक कए जल्द मिटेबा लेल डेग उठाउत।

नीक वा अधलाह - ज़रूर कहू जे मोन होय

comments

1 टिप्पणी

  1. unch siksha me gunwatapurn ke besi dhiyan rakhbak chahi khas ke vishwavidyalaya siksahk niyukti me ta aaor besi..merit ke sthan del jaou jahi san neek aa vishesagya sikshak appan seva da sakta..

Comments are closed.