तिरहुत क इकोसिस्टम

देश अपन स्‍वतंत्रताक 68 वर्ष पूरा केलक। एहि 68 वर्ष मे देश कतेको मामले मे सकारात्‍मक परिणाम देलक आ खूब प्रगति केलक अछि। सामाजिक, आर्थिक आ सांस्‍कृतिक प्रगतिक सं संग आन क्षेत्र मे सेहो देश उल्‍लेखनीय प्रगति केलक अछि। मुदा 1947 क परिपेक्ष मे देखिए त 2015 मे किछु एहनो क्षेत्र अछि जे उपेक्षित रहि गेल त किछु एहनो अछि ताहु स बदतर भ गेल। जाहि पर विचार आ मंथन समग्र विकास लेल जरूरी नहि बल्कि अनिवार्य अछि। आशावादी नजरि स  निराशावादी समाजक मसला कए उठेबाक हमर सतत प्रयास रहल अछि। आजादीक 69 साल बाद हम अपन शहर, अपन राज्‍य, अपन देश आ अपन समाज कए कतए आ कोना देखैत छी, ओकरा केहन आ कोना बनेबाक सपना गढैत छी ताहि पर इसमाद किछु विशेष लोक क आलेख अपने लोकनिक समक्ष राखि रहल अछि। आजादीक 69 साल बाद क एहि विशेष आयोजन क आजुक आलेख प्रस्‍तुत अछि।समदिया

गजानन मिश्र

Gajanan Mishraप्राचीन भारत से मुग़ल काल धरि तीरभुक्ति यानि तिरहुत यानि मिथिला एकटा राजनीतिक ईकाइ छल जे गंडक नदी से कोसी नदी तक विस्तृत छल । १७६५ ई. मे ईस्ट इंडिया कम्पनी क शासनक आरम्भि‍क समय मे जाहि सरकार तिरहुत क विवरण अछि ओ सेहो बागमती से कोसी कछैर स्थित बीरपुर तक फैलल छल । १७७९ ई. क मेजर रेंनेल कए बंगाल मैप मे तिरहुत क यहि‍ अंकन अछि । तिरहुत क पूर्वी सीमा कोसी 17 वी सदी तक बीरपुर-पुरनिया-कटिहार भए क मनिहारी मे गंगा मे मिल जाएत छल । एहि क उत्तर मे नेपाल क तराई आओर ओहि स सटल उत्तर हिमालय पहाड़ आ एकर दक्षिण मे गंगा सदिखने रहैत छल । एहि प्रकार तिरहुत मे मुजफ्फरपुर, वैशाली, सीतामढ़ी, शिवहर, दरभंगा, मधुबनी, समस्तीपुर, सुपौल, सहरसा, मधेपुरा, अररिया, पुरनिया, कटिहार ( अंतिम तीनो आंशिक रूप में) शामिल छल ।

तिरहुत क इ भूगोल कखनो टेथिस सागर मे छल । एहि सागर मे से हिमालय निकलल छल । हिमालय क दक्षिणी भाग Drainage कए समुद्र मे लए जेबा लेल गंगा बनल छल; गंगा तक ओकरा पहुँचेबा लेल तिरहुत मे विभिन्न नदी घाटी क विकास भेल । एहि तरह तिरहुत हिमालय आओर गंगा क बीच एकटा डेल्टा जैहन छल । हिमालय क नवीनतम पहाड़ होबाक कारण तथा एकर दक्षिणी सतह पर 2000 मिलीमीटर तक औसत बर्षा हेबाक कारण तिरहुत क नदी मे सिल्ट आओर पानिक मात्रा बेसी होएत अछि । हिमालय क ऊंचाई से निकलबा और गंगा मे मिलबा से पहिने मात्र 400-500 किलोमीटर चलबा क कारण एहि नदी मे प्रवाह गति बेसी होएत अछि ।

तिरहुत क इकोसिस्टम मे चारि‍ टा नदी घाटी प्रणाली अछि : कोसी, कमला-बलान, बागमती आओर बूढी गंडक । एहि इकोसिस्टम क उत्तरी अर्ध भाग मे ग्रेडिएंट यानि ढलान उत्तर से दक्षिण दिशा दिस तथा दक्षिणी अर्ध भाग मे पश्चिम से पूरब दिस अछि । कोसी मे सालाना औसतन २.५० लाख क्यूसेक क प्रवाह, कमला-बलान में ३५००० क्यूसेक, बागमती में ६५००० क्यूसेक होएत अछि । एहि मे ९०% जुलाई से मध्य अक्टूबर तक भए जाएत अछि । कोसी प्रणाली मे 20 टा धारा, कमला मे ९ टा धारा, बागमती मे ८ टा धारा आ बूढी गंडक मे 6 टा धारा अछि । मुदा बांध क कारण कोसी मे खाली दू टा धारा, कमला मे एकटा धारा, बागमती मे एकटा धारा आओर बूढी गंडक मे खाली एकटा धारा प्रवाहमान अछि; बाकी सभटा आन धारा परित्यक्त आओर paleo-channel  क रूप मे अछि जे जलजमाव पैदा करैत अछि, भूजल कए प्रदूषित करैत अछि, जलजन्य बीमारी पैदा करैत अछि आओर बाढ़ क समय अतिरेक जल राशि क निकासी सेहो नहि‍ कए पबैत अछि । इ paleo-channel   कए सेहो प्रवाहमान बनेबाक जरुरत अछि ताकि ई अपन अपन मूल धारा से नियंत्रित रूप मे डिस्चार्ज प्राप्त क सकय ।

एतय प्रकृति क कि‍छु ऐहन व्यबस्था अछि कि नदी नाला से सटल चौर होएत अछि यानि एहन भूमि जेकरा पर सालो भरि‍ या त अधिकांस समय पानि‍ जमा रहैत अछि । चौर स सटल निम्न भूमि क श्रृंखला होएत अछि जाहि मे मात्र बरसात मे पानी जमा रहैत अछि । एहि से लगल उँच भूमि क श्रृंखला होएत अछि जाहि मे मात्र भीषण बरसाते टा मे पानि‍ जमा होएत अछि । चौर क ऊपर से बहि‍कए आबय बला पानी मे घुलल प्रदूषक तत्व कए अपने मे जमा कए स्वच्छ पानि‍ नदी मे जाए दैत अछि । नदी कए गर्मी क समय जल क आपूर्ति सेहो कए ओकर जीवन्तता बनेने रखैत अछि । एहिलेल अपन परंपरा मे चौर कए नदी क भाई सेहो कहल जाएत अछि ।

इ नदी नाला चौर/कृषि भूमि क संग मिलकए एकटा इकोसिस्टम क निर्माण केने अछि । एहिमे flora आओर fauna क रास किस्म विकसित भेल छल जाहि कारण  एहि मे बहुत बेसी ecological stability विकसित भेल । इ प्रकृति क नियम अछि कि जतेक बेसी biological डाइवर्सिटी, ओते बेसी ecological stability आओर ओते बेसी economic फर्टिलिटी/प्रोडक्टिविटी ।

एहिलेल तिरहुत क तत्कालीन बंगाल सूबा जाहि मे बिहार, बंगाल, उड़ीसा, आसाम, बर्मा शामिल छल, मे धान, तेलहन, दलहन, ईख, तमाकू, शोरा, अफीम, नील, दूध, पाट, मशाला, मछली, आम, बैल, आलू आदि क उत्पादन मे अग्रणी छल । एतौका औद्योगिक उत्पाद यथा अफीम, नील, शोरा, चीनी, तम्बाकू क उत्पादन आओर विदेश मे व्यापार से ब्रिटिश शासन कए मजबूती भेटल छल । ‍1875 से १९२५ क बीच उत्तर बिहार मे रेलवे क जतेक प्रसार भेल ओतेक ओहि कालखंड मे सम्पूर्ण भारत मे नहि कैल गेल छल । इ अंग्रेजी शासक क तिरहुत क प्रति कोनो दरियादिली नहि‍ छल बल्कि एतय उत्पन्न प्राकृतिक उत्पाद आओर ओहि से निर्मित औद्योगिक पदार्थ क उपनिवेशवादी दोहन हेतु कैल गेल छल । १८७४ ई के macdonnel report मे धान क उपज ८.35 क्विंटल प्रति एकड़ उल्लिखित अछि । १८७० ई क दशक मे लदनिया-खुटौना-अंधरा, ठाढ़ी- फुलपरास क आलापुर परगना क syrveyor finucannes द्वारा सम्पादित सर्वे मे भुतही बलान क किनारे स्थित नरहिया ग्राम मे धान क उपज 20 क्विंटल प्रति एकड़ तक छल । कमला क क्षेत्र मे 35 क्विंटल प्रति एकड़ धान क उत्पादन पर आश्चर्य नहि‍ होएत छल । कोसी मे धुरे मन शकरकंद भेल करैत छल । आय सेहो कोसी बांध क क्षेत्र मे १०० क्विंटल मकई क दाना प्रति एकड़ उपज होएत छल । बागमती क उत्पादन क्षमता बिख्यात छल । एकटा महत्वपूर्ण तथ्य इ छल कि एहि खेती मे economic scale बहुत छल । इ पुर्णतः कुदरती खेती छल । एहि मे एतौका मानव आओर पशु क श्रम शक्ति क पूर्ण उपयोग होएत छल । एतौका चौर क अभिलेख मे धनहा चौर क रूप मे अभिलिखित होएत अछि । कियाकि एहिमे मुख्यतः धान आओर संगे-संग वा असगर-असगर रबी भदई फसल क रूप मे मुंग, मकई, बूट, खेसारी, मोटगर अनाज उपजेबा क प्रथा छल । पशु चारा आओर ढेर उपयोगी flora/fauna क श्रोत तथा gene-bank क रूप मे चौर अप्रतिम छल । चौर मे नाना प्रकार क आर्थिक महत्व के पदार्थ स्वयमेव जनमैत छल । कंद, मूल, बिसंर, चिचौर, सौरुकी आ घोंघा, सितुआ, कछुआ, कांकोर, मछली आदि । ये सभटा खाद्य पदार्थ अछि‍ । इ गरीब क common property क रूप मे निःशुल्क उपलब्ध छल । योजना १९९९ लिखैत अछि कि प्रति हेक्टेयर चौर मे २५० किलो मछली होएत छल । विलियम हंटर १८७७ ई मे एतय उपलब्ध 131 प्रकार क मछली क सूचि देने छल । एतय A2 प्रकार वला omega – 3 युक्त दूध दए बला गाय छल । आय यूरोप आओर अमेरिका देसी भारतीय गाय क A2 दूध क पॉंछा पागल अछि; आओर हम छि कि ओकर जर्सी, होल्सटीन, फ्रीजियन गाय क विषाक्त A1 दूध क दीवाना बनल छी ।

बाढ़ ग्रस्त क्षेत्र मे खेती क बारे मे सहरसा गजेटियर १९६४ दर्ज करैत अछि कि मार्च से मई क बीच खेत मे धान आओर मकई छींटल जाएत छल; मकई अगस्त मे काटल जाएत छल; धान नवम्बर-दिसंबर में काटल जाएत छल । इ धान लातरहा किस्म का होएत छल जे पानि‍ क संग बढैत जाएत छल । ऊँचगर खेत मे flood-resistent धान क प्रकार लगाओल जाएत छल जे 6-7 दिन तक बाढ़ि‍ कए बर्दास्त कए सकैत छल । कोसी में 3.00 लाख क्यूसेक पानि‍ एबा पर बाढ़ 1 से 2 दिन रहैत छल ।

१७६९ से १८५६ ई के तिरहुत क राजस्व अभिलेख से पता चलैत छल कि एतय एहि अवधि मे भीषण ब्यापक बाढ़ नहि‍ आयल छल । बाढ़ प्रायः हल्लुक भेल छल जाहि मे या त नगण्य क्षति होएत छल वा नम्हर अन्तराल पर कहियो कहियो बेसी क्षति होएत छल । मुदा इ क्षति क भरपाई सूद समेत अगला रबी वा भदई फसल से भए जायत छल । एहि अवधि मे १७८७ आओर १७९७ मे भीषण बाढ़ क रिपोर्ट भेटैत छल । १७८७ के बारे मे इ रिपोर्ट अछि कि जून माह मे भारी बारिश क कारण इ बाढ़ आयल छल ; स्वभावतः भदई फसल मे भारी क्षति भेल छल मुदा अगहनी फसल क सामान्य होबाक गप कहल गेल अछि । जतय तक १७९७ क बाढ़ क सवाल अछि, उ बर्ष खरीफ अगहनी फसल सामान्य भेल छल ‍। आजुक भयानक बाढ़ ग्रस्त सीतामढ़ी, शिवहर, औराई, कटरा 19वी सदी मे सामान्य छल जेहन कि विलिअम हंटर के रिपोर्ट १८७७ से ज्ञात होएत अछि । दरभंगा मधुबनी में कमला क बाढ़ से क्षति नगण्य होएत छल । तत्कालीन कमला आओर अधवारा कात स्थित बेनीपट्टी ,बिस्फी, रहिका क जरेल परगना आओर अधवारा- लखान्दई नदी क बीच स्थित पुपरी-बथनाहा-कटरा क नानपुर परगना सर्वाधिक विकसित क्षेत्र मे छल । १८५१ ई के revenue survey क कर्नल whyat क रिपोर्ट मे तिरहुत क बाढ़ कए सामान्य बताओल गेल छल ।

बिहार क शोक कोसी लेल बुकानन क पुरनिया रिपोर्ट १८०६-७ अछि जाहि मे कहल गेल छल जे कोसी क बाढ़ कोनो समस्या नहि‍ छल । विलियम हंटर क १८७७ क रिपोर्ट, ओ मेली क १९०७ क जिला गजेटियर मे तत्कालीन पुरनिया मे कोसी आओर महानंदा क बाढ़ कए सामान्य बताओल गेल छल । मुदा वहि कोसी १९०० से १९५० ई क मध्य तत्कालीन सहरसा जिला मे भीषण तांडव मचेने अछि । एहि अवधि मे सहरसा मे कोसी क कोनो धारा १५-२० साल से बेसी काल ध्ररि स्थिर नहि‍ रहल छल । ओतहि पुरनिया जिला मे १९०० ई से पहिने तक एकर धारा पांच पांच सौ साल तक एक्के जगह ठमकल छल । प्रतापगंज-देवीगंज, मधेपुरा-पुरनिया, ‍खगरिया-कटिहार, देवीगंज-पुरनिया,  ‍अंचरा- फारबिसगंज-अररिया, ‍मानसी-सहरसा-सुपौल आदि रेलवे/सड़क जे १८७५ से १९२५ ई क मध्य बनल छल मुख्यतः कोसी क प्रवाह कए संघातिक रूप मे दुष्प्रभावित केलक आओर एहिलेल कोसी विकराल बनि‍ गेल । ‍दरअसल तिरहुत सहित उत्तर बिहार मे बाढ़ क भयावहता १८७५ ई क बाद बढ़ल छल ।

रेलवे क निर्माण आरम्भ भेल । दरभंगा से चमथा घाट, रेल क ‍पटरी बाढ़ि‍क HFL से ऊपर राखल गेल आओर खर्चा बचेबा क लेल रेल में न्यूनतम वाटर वेज़ क प्रबधन अंग्रेजों केलक । सड़क निर्माण मे सेहो ऐहने भेल । फलतः नदी क drainage संघातिक रूप से दुष्प्रभावित भए गेल । ‍खगड़ि‍या मे गंगा मे खसय बाली बागमती/बूढी गंडक क प्रवाह मे रेलवे दिस से अवरोध उत्पन्न हेबाक कारण दरभंगा/तिरहुत मे १९०६ ई मे भारी बाढ़ आयल आओर भीषण क्षति दरभंगा गजेटियर १९०७ मे दर्ज कैल गेल । फलतः कोसी जे 19 वी सदी तक पुरनिया मे एकटा सामान्य नदी क भांति बाढ़ उत्पन्न करैत छल, आब 20 वी सदी मे सहरसा मे प्रलयंकारी बाढ़ उत्पन्न करय लागल । चूँकि कोसी स कमला-बलान, करेह आओर बागमती क drainage दुष्प्रभावित होएत अछि एहिलेल कोसी पुरान मुजफ्फरपुर आओर दरभंगा जिला मे बाढ़ि‍क तबाही वा सुखाड़ क समस्या लेल सेहो जिम्मेदार भए गेल । यानि कोसीये उत्तर बिहार क पुनरुद्धार क चाभी अछि । यद्यपि बांध मे कोसी कए जकैड़ कए नियंत्रित कैल गेल अछि मुदा बाँध बनेबा क बाद एकर स्थिति आओर बेसी बिगैड़ गेल अछि । किअ कि इ आशंका होबय लागल छल कि इ बाँध कए तोड़ि‍ कए पुनः तांडव करत । कि‍ २००८ क कुसहा कटान एकटा ट्रेलर साबित होएत?

सहरसाक कोसी क आर्थिक पक्ष पर दू टा प्रतिवेदन- macdonnel रिपोर्ट १८७४ आओर कोसी दियारा सर्वे रिपोर्ट १९२६ से जानकारी भेटैत अछि कि प्राक- कोसी कालीन सहरसा १८७४ मे ग्रॉस cropped area छल । एकर भौगोलिक क्षेत्रफल क ७८% छल जे कोसी कालीन अवधि १९२६ ई मे 126% बढ़ि‍ गेल; cropping intensity 13% से बढ़ि‍कए ४०% भए गेल । कृषि विकास क यहि दू टा मुख्य पैमाना होएत अछि । कोसी सहरसा जिला में  कृषि विकास केने छल । कोसी क बाढ़ मे भेल भयंकर क्षति एकर प्रवाह क संघातिक रूप से दुष्प्रभावित करबाक प्रतिफल छल । इ अंग्रेज़ सरकार क गलत नीति आओर लोगक अन्यमनस्कता क परिणाम छल ।

Symptomatic treatment  क आधार पर १९५० क दशक मे बनल बांध सबटा कसर पूरा कए देलक । १९५१ क कुल १५४ किलोमीटर बाँध क तुलना मे आय ३५०० किलोमीटर से बेसी बाँध अछि । तखनो नदी १९७५, १९८७, २००४, २००७,  २००८ में बाढ़ि‍क नब नब कीर्तिमान बनेने छल । १९५४ मे 25 लाख हेक्टेयर बाढ़ प्रवण क्षेत्र छल जे आब बढ़ि‍कए 68 लाख हेक्टेयर भए गेल छल ।

जतय तक पटवन क सवाल अछि, पश्चिमी कोसी नहर प्रणाली से दरभंगा-मधुबनी मे नगण्यप्राय पटवन होएत  छल, हाँ, सहरसा-पुरनिया मे पूर्वी कोसी नहर प्रणाली अपन मूल लक्ष्य 18 लाख एकड़ क स्थान पर 3-४ लाख से बेसी पटवन नहि‍ करि‍ पबैत छल । एहिलेल कोसी परियोजना पर आब प्रश्न चिन्ह लागय लागल अछि ।

अब स्थिति एहन भए गेल अछि कि जलजमाव, नदी-नाला क उथलापन, भीषण आओर प्रायः नियमित बाढ़, रासायनिक खाद, जहरीला छिडकाव, पोखर आओर चौर मे प्रदुषण, गाछक कटाव, तेलहन/दलहन क उत्पादन मे भयंकर कमी, A2 देसी गाय क दूध क स्थान पर A1 हाइब्रिड गाय/भैंस क रोगकारी दूध का चलन, polished चावल क उपयोग, जड़ी-बूटी क प्रति अनास्था आदि तिरहुत कए बिमारी क खान बना देने ‍अछि । ऊपर से राजनीतिक कलुषता, सामाजिक वैमनस्य, शासकीय असमर्थता आओर बौद्धिक अन्यमनस्कता करेला पर नीम !

एतय भारी उद्योग क ‍अनुकूलता नहि‍ अछि । डिजिटल इंडिया क साइबर कैफ़े क सेहो भूमिका बहुत सिमित अछि । service सेक्टर से सेाहो बेसी उम्मीद नहि‍ कियाकी आम लोगक पास पर्याप्त आमदनी नहि‍ अछि । आमदनी आओर आयोत्पादक साधन का तो अभाव अछिये । आय आवश्यकता अछि गरीब/आम लोग कए आयोत्पादक साधन उपलब्ध करेबाक । एहन आयोत्पादक सर्व सुलभ साधन माटि/पानी/पेड़ टा भए सकैत अछि । पानि‍ कए केन्द्र मे राखि‍कए अग्रोनोमिक विकास आओर ओकर औद्योगिक उपयोग क नीति टा एतय सर्वाधिक कारगर वा टिकाऊ भए सकैत अछि ।

इ अग्रोनोमिक विकास तखने संभव होएत जखन मूल संसाधन पानि‍क मुख्य श्रोत नदी-नाला एकर पर्यावरण क अनुकूल प्रबंधन कैल जाय । यहि‍ तिरहुत इकोसिस्टम मे इको-निर्वाण होएत ।

इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, latest bihar news, latest maithili news, latest mithila news, maithili news, maithili newspaper, mithila news, patna, saharsa

नीक वा अधलाह - ज़रूर कहू जे मोन होय

comments

कोई जवाब दें