टाउन प्लानर बिना कोना सुधरत शहरक संरचना

पटना: राजधानी पटना समेत बिहार क शहर कए सुंदर आ सुव्‍यवस्थित करबा लेल सरकार लंबा लंबा दावा करैत अछि, मुदा सच इ अछि जे सरकार लग कोनो टाउन प्‍लानर नहि अछि। जानकारक कहब इ अछि जे 1982 स 1994 तक राजधानी पटना क टाउन प्लानर रहलाह एसके सिन्हा । एहि संबंध मे सिन्हाक कहब अछि जे पटना मे 15 साल स कियो टाउन प्लानर नहि अछि। एकर स्‍थान पर सरकार आ निगम कंसल्टेंट रखने अछि। कंसल्टेंट क कारण आइ शहरी व्‍यवस्‍था मे अराजकता फैइल गेल अछि। आब त नक्शा बनेनिहार सब नक्शा पास करैत छथि। एहि एक मात्र उदाहरण स अहां कोनो टाउन क हाल बुझि सकैत छी। पहिने नगर निगम मे टाउन प्लानिंग एकटा पैघ विभाग होइत छल। आइ इ विभाग तकला स नहि भेटत। प्लानिंग क तहत बनल पटनाक पीसी कॉलोनी, कंकड़बाग, राजेंद्र नगर, एसके पुरी आदि मे एखनो परेशानी कम अछि। इतिहास देखी त वर्तमान पटनाक आधारभूत संरचना 1961 क आधार पर बनल अछि। एहि शहर कए अंतिम मास्टर प्लान 1961 मे बनाउल गेल छल। इ मास्टर प्लान 1981 तक मान्य रहल। आब सवाल उठैत अछि जे 1980 क बाद जे पटनाक विकास भेल ओकर आधार की छल। पिछला 40 साल पूर्व बनल बिल्डिंग बायलॉज क आधार पर राजधानी मे भवन निर्माण होइत रहल। तखन 10 लाख आ एक लाख क आबादी पर आवासीय भूखंड क निर्धारण आ भवन क आकार-प्रकार क निर्धारण कैल गेल छल। कहबा लेल 1985 मे सेहो एकटा मास्टर प्लान आयल मुदा एहि मे किछु एहन परिवर्तन क देल गेल जहि स इ प्रभावी नहि भ सकल। फेर त भवन क निर्माण मे जे अराजकता शुरू भेल से सबहक समक्ष अछि। लाख चाहलाक बावजूद नीतीश सरकार सेहो एकरा रोकि नहि पाबि रहल अछि। टाउन प्लानिंग पर काज कोना होएत एहि सवाल पर सिन्‍हा कहलथि जे जखन टाउन प्लानर नहि रहत त बेतरतीब शहर बसबे करत। अपन कार्यकाल क चर्चा करैत सिन्हा कहलथि अछि जे तखन टाउन प्लानर क अनुमति क बिना मकान बनेबा लेल कियो साचि नहि सकैत छल, मुदा आइ राज्य क जिला मुख्यालय स लकए नगर निगम क क्षेत्र मे जेना मकान बनि रहल अछि एहि स भविष्य मे आओर परेशानी बढ़त। सिन्हा कहला जे शहर कए बचेबा आ सुंदर बनेबा लेल उत्तर आ दक्षिण बिहार लेल एक-एकटा टाउन प्लानर क संगहि एहि विभाग कए पुनर्जीवित करबाक चाही। अन्यथा बिल्डिंग बायलॉज बनेला मात्र स शहर क सूरत बदलत इ सोचब मूर्खता अछि।

इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa

नीक वा अधलाह - ज़रूर कहू जे मोन होय

comments