जून स शुरू होएत देखनुक पटनाक काज

Picture1

रिवर सिटी, गंगावे, संग्रहालय स भेटत इंटरनेशनल लुक
प्रीतिलता मल्लिक
पटना । पहिल बेर पटना मे तीन दिवसीय इंडियन बिल्डिंग कांग्रेसक आयोजन कैल गेल। मुख्यमंत्री नीतीश कुमार एकर उद्घाटन करैत कहला जे बिहार मे विकास क काज ठमकल छल। आब बहुत किछु बनेबाक अछि, जे बनत से सबस नव तकनीक स बनत। ओ कहला जे पर्यावरण क हित आ भूकंपरोधि भवन पर विशेष ध्यान देल जाए। मुख्यमंत्री कहला जे आब एहन भवन बनेबा दिस हमरा सब कए जेबाक चाही जेकरा सिग्नेचर बिल्डिंग कहल जा सकए। दू दिनक एहि सम्मेलन मे बिहार क इंजीनियर बाढ आ भूकंपरोधी भवन क निर्माण क गुर सीखताह। इ कांग्रेस एहन समय मे भ रहल अछि, जखन पटना मे विश्ववस्तरीय रिवरसिटी, गंगावे और चारिटा विशेष भवन क निर्माण कार्य शुरू भ रहल अछि। कांग्रेस मे बिल्डिंग निर्माण क तकनीक पर जे मंथन होएत, ओहि स निश्चित रूप स राजधानी कए अंतरराष्ट्रीय लुक देबा मे मदद भेटत।
जून मास स पटना क स्वरूप बदलबाक काज शुरू भ जाएत। दिल्ली आ मुंबई स आधुनिक, रायपुर स सुंदर रिवरसिटी क परिकल्पना एहि साल क अंत तक जमीन पर उतारबाक प्रयास शुरू भ गेल अछि। गंगा क कछैर मे प्रस्तावित रिवर सिटी गंगावे क निर्माण क संग संग विकसित होएत। विख्यात वास्तुकार हाफीज कांट्रेक्टर क तैयार कैल डिजाइन पर सरकार सैद्धांतिक सहमति द देलक अछि। पूर्णत: निजी निवेश स तैयार भ रहल रिवरसिटी लेल किसान स जमीन लेबाक कोनो जरुरत नहि पडत। गंगाक कछैर मे एकरा लेल प्रयाप्त जमीन अछि। संगहि गंगा मे बनल डेल्टा क उपयोग सेहो कैल जाएत। निश्चित रूप स इ पटना कए इंटरनेशनल लुक प्रदान करत।
ओना सरकार सेहो मुख्य सड़क बेली रोड पर तीनटा भव्य भवन क निर्माण शुरू क रहल अछि। अंतरराष्ट्रीय संग्रहालय क निर्माण करीब 500 करोड क लागत स भ रहल अछि, जे 2015 मे तैयार भ जाएत। बिहार दिवस क मौका पर मुख्यमंत्री एकरा राज्य कए सर्मपित करताह। आयकर गोलंबर लग सात मंजिला नियोजन भवन क निर्माण सेहो जून मे शुरू भ जाएत। एहि सडक पर ग्रीन पुलिस मुख्यालय क सेहो निर्माण होएत। एकर औपचारिकता पूरा क लेल गेल अछि। एकर संगहि राजधानी मे गंगाकात गंगावे क निर्माण सेहो जून स शुरू भ जाएत, संगहि एहि गंगावे स सटल इंटरनेशनल कन्वेंशन सेंटर क निर्माण सेहो जून स शुरू भ जाएत। एहि मे पांच हजार लोकक बैसबाक व्यवस्था होएत। एहि लेल गांधी संग्रहालय स मगध महिला कॉलेज क बीच जमीन समतल कैल जा रहल अछि। नव विधानसभा भवन आ विधायक क लेल डुप्लेक्स बंगला क सेहो निर्माण जून क बाद शुरू भ जाएत। एकर निर्माण पर एक हजार करोड स बेसी खर्च होएत। सरकार निर्माण कार्य कए अंतरराष्ट्रीय लुक देबा लेल विश्वस्तरीय डिजाइन तैयार करबेलक अछि। निर्माण कार्य क नोडल एजेंसी भवन निर्माण विभाग कए बनाउल गेल अछि।
विधायक भवन
एरिया- 43 एकड.,
लागत -276 करोड.
निर्माण अवधि -24 माह
की-की होएत : दू मंजिला भवन, 50 विधायक हॉस्टल आ 30 विधान पार्षद लेल हॉस्टल। चहारदीवारी क भीतर-लौंड्री, मेंटेनेंस सर्विस ब्लॉक, पुलिस पोस्ट., सडक, पार्क,

इंटरनेशनल कन्वेंशन सेंटर
एरिया – 12 एकड.,
लागत-313.24 करोड.
निर्माण अवधि -30 महीना
की-की होएत : पांच हजार सीट क आॅडिटोरियम, बेसमेंट मे पार्किंग, आठ सौ लोक क क्षमतावाला प्लेनरी हाल,सभ्यता पार्क, सभ्यता द्वार, सडक, चहारदीवारी, बहुउद्देशीय ज्ञान भवन, सीवरेज ट्रीटमेंट प्लान, सीसीटीवी, फायर डिटेक्शन आ फायर अलार्म।
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bihar news, darbhanga, latest bihar news, latest maithili news, latest mithila news, maithili news, maithili newspaper, mithila news, patna, saharsa

नीक वा अधलाह - ज़रूर कहू जे मोन होय

comments