चमडा उद्योग लेल प्रसिद्ध सकरी क भेल उपेक्षा, सरकार द रहल पटना आ बक्‍सर मे जमीन

यूपी स बिहार दिस विदा भेल टेनरी उद्योग
पटना/ कानपुर ।
कानपुर क चमड़ा उद्योग आब बिहार क रुख क रहल अछि। अगर कानपुर स पैघ टेनरी घराना बिहार आबि जाइत अछि त उत्तर प्रदेश क उद्योग कए करीब 4000 करोड़ टकाक कारोबार कए झटका लागत । बिहार सरकार कानपुर क टेनरी मालिक कए बिहार मे टेनरी उद्योग खोलबा लेल तीनटा स्थान सुझेलक अछि । गौरतलब अछि जे तीनूटा स्‍थान दक्षिण बिहार मे अछि, जखन कि खंडहर भ चुकल सकरी क चमडा उद्योग अपन उद्धार क बाट ताकि रहल अछि। सकरी कए नजरअंदाज क सरकार चमडा उद्योग लेल पहिल स्थान पटना स 15 किलोमीटर क दूरी पर देखेलक अछि, जखनकि दोसर स्थान बक्सर जिला मे अछि आ तेसर स्थान उत्तर प्रदेश क वाराणसी स सटल अछि ।
एहि संबंध मे जानकारी दैत उत्तर प्रदेश लेदर एसोसिएशन क महामंत्री आ एकटा पैघ टेनरी क मालिक इफ्तखारुल अमीन कहला अछि जे चमड़ा उद्योग क एकटा प्रतिनिधिमंडल बिहार सरकार क आला अधिकारी स भेंट केलक अछि आ बिहार सरकार स मदद क अपील केलक अछि। बिहार सरकार सेहो टेनरी खोलबा लेल हुनका हर संभव मदद करबाक आश्वासन देलक अछि। कानपुर क टेनरी व्यापारी बिहार सरकार क आला अधिकारी संग 15 मार्च कए निर्णायक बैसार करताह जाहि मे संभवत: बिहार क मुख्यमंत्री नीतीश कुमार सेहो शामिल हेताह । इफ्तखारुल अमीन कहला अछि जे कानपुर स बिहार गेल प्रतिनिधि मंडल मे कानपुर क प्रमुख चमड़ा घराना जेना सुपर हाउस (सालाना टर्नओवर करीब 450 करोड़ ) रहमान टेनरी (सालाना टर्नओवर करीब 300 करोड़) , सुपर टेनरी (सालाना टर्नओवर करीब 450 करोड़), जेएस एक्सपोर्ट (सालाना टर्नओवर करीब 500 करोड़ ) आ चारिटा अन्य छोट टेनरी क मालिक शमिल छलाह जिनकर कुल सालाना टर्नओवर करीब 400 करोड़ टका अछि।
यूपी लेदर एसोसिएशन क महासचिव अमीन कहला जे बिहार क अधिकारी क संग बैसार बहुत सौहार्दपूर्ण वातावरण मे भेल। बिहार सरकार कानपुर क टेनरी मालिक कए बिहार मे टेनरी उद्योग खोलबा लेल तीनटा स्थान सुझेलक अछि। एकर अतिरिक्त बिहार सरकार कहलक अछि जे ओ चमड़ा उद्योग स्थापित करबा लेल 400 एकड़ क क्लस्टर जमीन उपलब्ध कराउत आ एहि ठाम कॉमन एफ्लुएंट ट्रीटमेंट प्लान (सीईटीपी) संयुक्त उत्प्रवाह शुध्दीकरण संयत्र स्वयं स्थापित करत। एकर अलावा ओ उत्तर प्रदेश क टेनरी उद्योग कए उत्तर प्रदेश स कम दर पर 24 घंटा बिजली उपलब्ध कराउत, एकरा लेल टेनरी लेल अलग स 30 मेगावाट बिजली क व्यवस्था कैल जाएत।
अमीन कहला जे एकर अलावा उत्तर प्रदेश क टेनरी उद्योग लेल बिहार मे सिंगल विंडो क्लियरंस सिस्टम होएत। सुपर टेनरी क इफ्तखारुल अमीन आ जेएस एक्सपोर्ट क जावेद सलोजा बिहार सरकार क एहि प्रस्ताव स बहुत उत्साहित आ संतुष्ट छथि। अमीन क कहब अछि जे 15 मार्च स पहिने ओ सब एक बेर आओर पटना जेताह। 15 स पहिने तीनू प्रस्तावित साइट क निरीक्षण करबाक संग संग मुख्यमंत्री नीतिश कुमार संग बैसार लेल प्रसताव कए अंतिम रूप सेहो देबाक कोशिश कैल जाएत। प्रतिनिधि मंडल मे शामिल एकटा टेनरी मालिक क कहब अछि जे ओ सब पिछला कई साल स कानपुर मे चमड़ा क कारोबार क रहल छथि आ उत्तर प्रदेश कए करोड़ क करोड राजस्व देलथि अछि, मुदा बिहार जेका कहियो उत्‍तरप्रदेश क सरकार हुनका संग सहयोगात्‍मक व्‍यवहार नहि केलक ।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna, दरभंगा, मिथिला, मिथिला समाचार, मैथिली समाचार, बिहार, मिथिला समाद, इ-समाद, इपेपर

नीक वा अधलाह - ज़रूर कहू जे मोन होय

comments