कोसी क कछैर मे जूट क मजार

1
2
esamaad maithili newspaper

रंजीत कुमार
बिहार क कोसी अंचल कए जूट क खेती लेल जानल जाइत अछि। उत्पादन क लिहाज स इ इलाका पश्चिम बंगाल आ असम क बाद देश क तेसर सबस पैघ जूट उत्पादन केंद्र रहल अछि। कोसी अंचल क पूर्णिया, कटिहार, मधेपुरा, सुपौल, अररिया आ किशनगंज क कई लाख किसान लेल जूट नकदी आमदनी क प्रमुख स्रोत रहल अछि। सच त इ अछि जे कोसी क किसान लेल जूट (जेकरा स्थानीय लोक पटुआ बा पाट कहैत छथि) महज एकटा फसल मात्र नहि अछि, बल्कि जिनगी आ संस्कृति क हिस्सा अछि। एहि ठाम पटुआ क दर्जन भरि कहावत आ अनगिनत किस्‍सा प्रचलित अछि। एकटा कहावत क उल्लेख प्रासंगिक होएत,”ज उपजतो पाट तें देखिअ ठाठ। यैह कारण अछि जे तमाम मुश्किल आ विपरीत हालात क बावजूद इलाका क कई लाख खेतिहर आइ सेहो जूट क खेती जारी रखने छथि।
मुदा विडंबना इ अछि जे पिछला किछु साल स स्थिति लगातार जूट खेती क प्रतिकूल होइत जा रहल अछि। अगर हालात एहने रहल त ओ दिन दूर नहि जखन जूट क खेती सेहो मड़ुआ, जौ, काउन, अल्हुआ, भदई धान (जेकर कोसी अंचल मे इ खूब उत्पादन होइत छल) क जेकां कोसी क किस्सा बनि जाएत। एकर कईटा कारण अछि। सबस पैघ कारण सरकार क जूट नीति अछि, जे धीरे-धीरे किसान क रीढ़ तोडि देलक । हाल मे केंद्रीय इस्पात मंत्री बेनी प्रसाद वर्मा कहला अछि जे हुनका महंगाई स खुशी होइत अछि, किया त एहि स किसान कए फसल क बेसी दाम भेट रहल अछि। ओना त वर्मा क इ बयान देखबैत अछि जे हमर मंत्री जमीनी हकीकत स पूर्णत: नावाकिफ छथि। मुदा जूट क मूल्‍य क हालिया इतिहास क मद्देनजर देखि त वर्मा क बयान कोनो जहर-सिक्त तीर क जेका चूभैत अछि। 1984 मे देश मे जूट क मूल्य 1400 टका क्विंटल छल। आइ 2012 मे यानी 28 साल बाद इ घटकए 1200 टका प्रति क्विंटल पर आबि गेल अछि। पिछला 28 साल मे टका मे भेल अवमूल्यन पर अगर ध्‍यान नहि दी तखनो कोनो व्यक्ति जूट उत्पादक किसान क दर्द क अंदाजा लगा सकैत अछि आ जूट क मूर्छित खेती क मर्ज आसानी स बुझल जा सकैत अछि।
दर्द क हद स गुजरब त एखन बाकी अछि किया त समर्थन मूल्य नामक मिसाइल क मार तक इ सीमित नहि अछि। सच त इ अछि जे पिछला चारि दशक मे जूट उत्पादक कए तरह-तरह क हथियार स पीटल गेल अछि। सबस घातक वार छल, बेलगाम प्लास्टिक नीति। गौरतलब अछि जे जूट क किसान सब कए बचेबा लेल एक जमाना मे सरकार लग संरक्षण नीति छल। तखन चीनी, चावल, सीमेंट समेत तमाम कारखाना लेल कम-स-कम तीस प्रतिशत जूट क बोरी क इस्तेमाल अनिवार्य छल। मुदा उदारीकरण क आंधी मे इ नीति तिनका जेका उधिया गेल आ ककरो किसानक चीख तक नहि सुनाई देलक। प्लास्टिक क बोरी सस्‍त छल (एखनो अछि), एहि लेल उत्पादक जूट बोरी क इस्तेमाल बंद क देलक। जाहि स देसी बाजार मे जूट क मांग कम होइत गेल। तकनीक क बल पर वस्त्र उद्योग एतबा आगू चल गेल जे जूट स बनल मोट कपडा गरीब त पहिरब छोडि देलक। दरिद्रता क प्रतीक भ चुकल जूट स बनल पहनाबा सदा क लेल समाप्त भ गेल। इ गप आओर अछि जे आब इ प्लास्टिक धरती पर सेहो भारी असर द रहल अछि। कहबाक जरूरत नहि जे प्लास्टिक क अत्‍यधिक इस्तेमाल पर्यावरण आओर पारिस्थितिकी कए गंभीर रूप स बिगाडि देलक अछि, जेकरा मात्र पर्यावरण-प्रिय जूट ठीक क सकैत अछि। जूट क खेती कए तेसर मारि जूट रिसर्च इंस्टिट्‌यूट स पडल, जे जानलेवा साबित भेल। इ संस्था पुरान नस्ल कए खत्म क देलक आ उन्नत नस्ल क नाम पर जे बीज तैयार केलक ओहि स पैदावार बढबाक बदला मे घटैत चल गेल।
जलवायु परिवर्तन सेहो जूट क खेती पर कहर बरपा रहल अछि। गौरतलब अछि जे जूट मौसम क प्रति अत्याधिक संवेदनशील पौधा अछि। मौसम क कनि प्रतिकूलता एकरा चौपट क दैत अछि। मुदा हाल क किछु साल स मौसम चक्र लगातार असंतुलित भ रहल अछि, जाहि स परिणामस्वरूप जूट क पैदावार मारल जा रहल अछि। जलाशय क कमी सेहो जूट क खेती कए प्रभावित क रहल अछि। जूट स रेशा निकालबा लेल एकरा स्थिर पाइन मे सडेबाक प्रयोजन होइत अछि, मुदा स्थिर पाइन क परंपरागत स्रोत मसलन झील, ताल,चौर, पोखर आदि तेजी स भरल जा रहल अछि।
संक्षेप मे कही त आइ जूट क खेती केवल किसान क जिद आ देसी उपयोगिता क बल पर जीवित अछि। ओ युग बीत गेल जखन किसान एकरा “हरा नोट” कहैत छल। ओहि दौर मे जूट कोसी अंचल क किसान लेल दुर्गापूजा, दीपावली, मुहर्रम क सौगात ल कए अबैत छल। सितंबर मे एकर रेशा तैयार होइत छल। सब किसान कए पाबनि लेल नीक नकदी भेट जाइत छल। आब त लोक जूट क डंठल (सोंठी) आ रस्सी लेल जूट उपजा रहल छथि। कोसीक लोक आइ सेहो जूट क डंठल स घर क टाट बना रहल छथि। सोंठी एहि ठाम क लोक लेल जलावन क महत्वपूर्ण स्रोत सेहो अछि।

maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna

Please Enter Your Facebook App ID. Required for FB Comments. Click here for FB Comments Settings page

1 COMMENT

Comments are closed.