केंद्र सड़क निर्माण मे बाधक बनि रहल अछि : नीतीश

पटना। मुख्यमंत्री नीतीश कुमार विधान परिषद मे एकटा प्रश्नक उत्तर मे सीधा कांग्रेस कए निशाना बना कहलथि जे बिना विकास ककरो वोट नहि भेटत। कांग्रेस जे करि रहल अछि, ओहि स ककरो फायदा नहि होयत। केंद्र बिहार मे सड़क नहि बना रहल अछि, हम सड़क बनेबा लेल अनुमति मांगी रहल छी, त अनुमति सेहो नहि द रहल अछि आ सदन मे कांग्रेसक विधायक हल्ला करि रहल दथि जे सड़क नहि बनि रहल अछि। अजीब गप अछि, केन्द्र मे बैसल कांग्रेसी चाहैत छथि जे बिहार मे हुनकर पार्टी क सरकार क गठन भ जाए, मुदा एकरा लेल राजग सरकार कए असफल करबाक चक्कर मे बिहारक विकासक विरोध भ रहल अछि। हम कहैत छी जे कांग्रेसी विधायक अपन दिल्ली मे बैसल नेता स बिहार मे सड़क आ पुल बनबा दथि, हम तैयार छी। मुख्यमंत्री कहला जे केन्द्र क सहमति क प्रत्याशा मे एनएचएआई क सड़क क मरम्मत आ निर्माण राज्य क राशि स भेल अछि। एहि पर 711 करोड़ व्यय भेल अछि। कांग्रेस विधायक आ केंद्र सरकार कए एकर स्वागत करबाक चाही,मुदा केन्द्र त राशि क भुगतान रोकि लेलक अछि। ओ प्रश्नकर्ता कांग्रेस विधायक दल क नेता महाचन्द्र प्रसाद सिंह स एनएचआई 77 हाजीपुर-मुजफ्फरपुर क चौड़ीकरण आ गोढिय़ा क समीप पुल निर्माण क अनुमति केन्द्र स लेबा मे सहयोग मंगलथि। मुख्यमंत्री कहला जे एनएचआई क मानक क तहत पुल आ सड़क निर्माण मे राज्य सरकार सक्षम अछि। हमरा मात्र केन्द्र क सहमति चाही। मुख्यमंत्री कहला जे पहिने बोर्ड लगा देल जाइत छल जे इ केन्द्र क सड़क अछि, मुदा हम एहन नहि करि रहल छी किया कि हमरा लेल सबटा बिहारक सड़क अछि। एहि सोच स हम केंद्र क हिस्सा क सड़क क मरम्मत करा देलहुं, मुदा केंद्र आब टका नहि द रहल अछि। एहि पर कांग्रेसी सदस्य उत्तेजित भ गेलाह। मुख्यमंत्री बेर-बेर कहला जे हम अहां स सहयोग चाहैत छी, सड़क बिहारक छी ओ सरकार या विपक्षक नहि छी, सड़क बनबाक चाही, हमरा अहां सहयोग दी त हम अहां संग दिल्ली जेबा लेल तैयार छी। एहि पर प्रश्नकर्ता महाचन्द्र प्रसाद सिंह कहला जे हुनका स जे सहयोग भ सकत ओ मुख्यमंत्री कए देबा लेल तैयार छथि।

नीक वा अधलाह - ज़रूर कहू जे मोन होय

comments