केंद्र क विरोध जारी, पांचटा सड़क कए चार लेन बनेबा स केलक इनकार

पटना। पगडंडी कए सडक बुझनिहार बिहारक लोग पिछला सात साल स फोरलेन सडकक बाट ताकि रहल छथि। मुदा बिहार क विरोध करब केंद्र क स्वभाव बनि चुकल अछि। पिछला छह दशक स गरीब आ पिछडल एहि राज्य कए केंद्र एखनो विकासक बाट पर चलैत नहि देखए चाहैत अछि। एकबेर फेर बिहार संग उपनिवेश सन व्यवहार भ रहल अछि। राज्यक विकास लेल सबस जरूरी तत्व सडक क मामला मे केंद्र राज्य कए जोर क झटका देलक अछि। एक कात जतए रोज बिहार मे गाडीक बढोतरी भ रहल अछि, त दोसर दिस केंद्र सरकार ट्रैफिक क बहाना बना राज्यक क पांचटा महत्वपूर्ण सड़क कए फोर लेन बनेबा स इनकार करि देलक अछि। आब इ पांचो सडक टू लेन मे बनत। गौरतलब अछि जे केंद्रक इ फैसला एकतरफा अछि आ एहि विषय मे राज्य स कोनो गप नहि कैल गेल अछि। मोकामा-मुंगेर आब चारि क बदला मे महज दू लेन मे बनत। एनएचडीपी (राष्ट्रीय राजमार्ग विकास परियोजना) फेज-3 क एहि सड़क कए ल कए केंद्र मुंगेर क प्रस्तावित महासेतु पर ध्यान सेहो नहि देलक, जाहि पर अगिला दस वर्ष क भीतर ट्रैफिक लोड बढबाक पूरा संभावना अछि। एनएचएआई क महाप्रबंधक कर्नल चंदन वत्स कहैत छथि-ट्रैफिक लोड क हिसाब स दू लेन स काज चलि जाएत। एकरा लेल अतिरिक्त भूमि अधिग्रहण क जरूरत नहि पड़त। 351 करोड़ क इ परियोजना सीएंडसी कए आवंटित करि देल गेल अछि। चारिटा सड़क एखनो अटकल अछि, जाहि मे मुजफ्फरपुर-सोनबरसा, खगड़िया- पूर्णिया, गोपालगंज-छपरा आ आरा- बक्सर शामिल अछि। इ चारू सडक सेहो चार लेन क बदला मे आब दू लेन क बनत। एनएचएआई (राष्ट्रीय राजमार्ग प्राधिकरण) एकरा लेल नव सिरा स अधिसूचना जारी करत। एकरा लेल सेहो बहाना ट्रैफिक लोड कहल जा रहल अछि। ओना राज्यक किछु सडक कए दू लेनक स्थान पर चारि लेन मे बनेबाक मंजूरी द देल गेल अछि जाहि मे एनएचडीपी फेज-3 क तहत 11टा सड़क शामिल अछि। एहिमे हाजीपुर-मुजफ्फरपुर, पटना-बख्तियारपुर, खगड़िया-बख्तियारपुर, छपरा- हाजीपुर आ मोतिहारी-रक्सौल शामिल अछि। जायका क सहयोग स पटना- गया-डोभी सड़क कए सेहो फोर लेन कैल जा रहल अछि।

नीक वा अधलाह - ज़रूर कहू जे मोन होय

comments