कान्फ्रेंसिंग रूम देख गदगद भेला किसान

भागलपुर। बिहार एग्रीकल्चर यूनिवर्सिटी (बीएयू) कए विश्वस्तरीय बनेबाक कवायद मे एक संथ 40 गोटे क बैसबा जोकर एकटा कान्फ्रेंसिंग रूम तैयार कैल गेल अछि। कान्फ्रेंसिंग रूम मे भेल पहिल बैठक मे दूर-दराज स आयल प्रगतिशील किसान एकरा देखिकए गदगद भ गेलाह। किसान क कहब छल जे बहुत बढ़िया आ हाईटेक अछि इ रूम। एहि ठाम न केवल कान्फ्रेंसिंग रूम, बल्कि वीसी कक्ष, वीसी सेल आ डीन एग्रीकल्चर क कक्ष क सेहो साज-सज्जा स्तरीय अछि। हाईटेक आ वातानुकूलित बनल एहि कोठली कए कार्डलेस ऑडियो सिस्टम, वायरलेस प्रोजेक्टर, स्मार्ट चेयर, हाईफाई लाइट स सुसज्जित कैल गेल अछि। एकरा तैयार करबा मे दस लाख टका खर्च भेल अछि। एकर अलावा 15 लाख क लागत स वीसी चौंबर, 7 लाख क लागत स वीसी सेल आ 6 लाख खर्च क डीन एग्रीकल्चर क चौंबर तैयार भेल अछि। हार्टीकल्चर विभाग मे 60 गोटे कए बैसबा जोकर हाईटेक सेमिनार हॉल लगभग बनि कए तैयार अछि। बीएयू क सबटा डीन डायरेक्टर आ अन्य अधिकारीक चौंबर सेहो हाईटेक तरीका स तैयार करि सबटा आधुनिक सुविधा उपलब्ध कराउल जा रहल अछि। फिलहाल चौंबर तैयार करबा मे 2 करोड़ क राशि खर्च भ चुकल अछि। कॉरपेरेट सेक्टर क भांति सबटा हॉल आ चैंबर बनि रहल अछि। भारत सरकार क अधीन कार्यरत राष्ट्रीय उपभोक्ता सहकारी संघ नोएडा क कंपनी एनसीसीएफ क प्रतिनिधि मनोज कुमार क निगरानी मे एकरा बनाउल जा रहल अछि। सेंट्रल स्टोर क इंचार्ज सह वरीय वैज्ञानिक डॉ. रंधीर कुमार कहला जे विश्वविद्यालय कए विश्वस्तरीय बनेबा लेल एकरा आधुनिक उपकरण स लैस कैल जा रहल अछि। ताकि एकबारगी एकरा देखिकए लोक क बिहारक प्रति धारणा बदलि जाए। बीएयू क प्रेक्षागृह कए सेहो हाईटेक बनेबाक संग-संग विश्वविद्यालय क पूरा परिसर कए वाई-फाई सिस्टम स ऑन लाइन करबाक काज भ रहल अछि।

नीक वा अधलाह - ज़रूर कहू जे मोन होय

comments