कांग्रेस संग सरकार नहि बनाएब: लालू


पटना । राजद सुप्रीमो लालू प्रसाद चुनाव क बाद कांग्रेस क संग तालमेल क सरकार बनेबाक संभावना स इनकार केलथि। लालू कहला जे कोनो हालात मे कांग्रेस क संग तालमेल क सरकार बनेबाक कोनो संभावना नहि अछि। लालू प्रसाद कहला जे रामविलास पासवान क लोजपा संग ओ भारी जीत हासिल क रहल छथि आ अपन दम पर सरकार बनेताह। राजद क राष्ट्रीय उपाध्यक्ष रघुवंश प्रसाद सिंह क बयान कए हुनकर व्यक्तिगत बयान कहैत लालू कहला जे त्रिशंकु विधानसभा क स्थिति मे सेहो राजद आ कांग्रेस मे कोनो तालमेल नहि भ सकैत अछि। राजद सुप्रीमो कहला जे ओ एहि मामला पर रघुवंश बाबू स गप केलथि अछि।
कांग्रेस पर हमला करैत लालू कहला जे ओ अपन भविष्य तकबा लेल बिहार विधानसभा चुनाव मे उतरल अछि। ओ कहला जे कांग्रेस ककरो दोस्त नहि भ सकैत अछि। लालू कहला जे रघुवंश बाबूक योजना नरेगा कए कांग्रेस अपन उपलब्धि बता लोक कए गुमराह करि रहल अछि। इ योजना राजद सन पार्टी केंद्र मे छल तखने संभव भेल, कांग्रेस एहन योजना कए खाका तैयार नहि कए सकैत अछि।
राजद अध्यक्ष बिहार क वर्तमान सरकार कए सब मोचा पर विफल करार दैत कहला जे पूरा राज्य सूखा क चपेट मे अछि आ सरकार किसान क कोनो सहायता नहि केलक। ओ कहला जे मुख्यमंत्री पिछला चुनाव मे बिजली क उत्पादन बढेबाक आ उद्योग-धंधा लगेबाक वादा केने छलाह मुदा बिहार मे पिछला पांच साल मे एक मेगावाट अतिरिक्त बिजली क उत्पादन नहि भेल अछि आ ने कोनो उद्योग-धंघा लागल अछि। ओ कहला जे नीतीश उद्योग धंधा क नाम पर हर पंचायत मे शराब क दुकान जरूर खुलवा देलथि अछि। यादव राज्य सरकार पर दलित कए बांटबाक आरोप लगबैत कहला जे मुख्यमंत्री महादलित कए जमीन, इंदिरा आवास, रेडियो आ टेलीविजन दैत छलाह मुदा ककरो किछु नहि भेट। ओ कहला जे हुनकर पार्टी सत्ता मे आईल त उच्च वर्ग क लोक कए संग लकए चलताह।
लालू प्रसाद यादव कहला अछि जे ओ नीतीश जेकां अनुबंध पर नौकरी नहि देताह बल्कि हुनकर सरकार बनल त अनुबंध पर राखल गेल सबटा शिक्षक कए स्थाई करि देताह। साइकिलक बदला मे मोटरसाकिल देबाक घोषणा करनिहार लालू साफ केलथि जे हुनकर राज मे एहन अन्याय नहि होएत। ओ कहला जे चारि हजार मे आइ की होइत अछि, महंगाई जेना नीतीश राज मे आसमान पर अछि एहन मे त इ टका मुंह चिढा रहल अछि। ओ कहला जे नीतीश क राज मे केवल घोटाला भेल अछि, तीन मास मे नालंदा क महिला बच्चा पैदा क रहल अछि, आब कहू त एहनो कतहु भेल अछि। ई सरकार सब तरह स जाइ लेल तैयार अछि।

नीक वा अधलाह - ज़रूर कहू जे मोन होय

comments