एयरपोर्ट वाला दरभंगा मे बस स्टैंड लेल जमीन नहि

दरभंगा। सुनबा मे अजीब लागत मुदा इ सच अछि जे दरभंगा मे एयरपोर्ट त अछि मुदा बस स्‍टैंड लेल जमीन नहि अछि। दरभंगा नगर निगम बस स्‍टैंड लेल एखन धरि जमीन नहि ताकि सकल अछि। पहिने राजकुमारगंज आ वर्तमान मे कादिराबाद स्‍िथत बस स्टैंड दूनू नगर निगम भाडाक जमीन पर बना रखने छल। मुदा आब कादिराबाद स्थित बस स्‍टैंड लेल लीज पर देल जमीन ललित नारायण मिथिला विश्वविद्यालय वापस चाहैत अछि। विश्‍वविद्यालय नगर निगम क लीज बढेबाक आग्रह मानबा लेल तैयार नहि अछि। विवि प्रशासन 31 मार्च कए जमीन खाली करबा लेल नगर निगम कए कहि देलक अछि। पिछला 60 साल मे बस स्‍टैंड लेल जमीन नहि ताकि सकल नगर निगम क प्रशासन आब वैकल्पिक व्यवस्था नहि भेला तक आ विधि व्यवस्था क मद्देनजर जनहित मे बस स्टैंड कए एखन खाली करबा मे असमर्थता जाहिर केलक अछि। नगर निगम विवि प्रशासन स अनुरोध केलक अछि जे एखन एकरा निगम क जिम्‍मा मे छोडि देल जाए। मुदा विवि प्रशासन नरगौना मे आवासीय भवन बनेबाक योजना पर बबाल भेलाक बाद अपन योजना लेल जमीन तकबा मे लागल अछि। नरगौना पैलेस मामला मे विवि प्रशासन पर इ आरोप लागल छल जे ओ अपन जमीन लीज पर देने अछि आ कामेश्‍वर नगर मे बिना पर्यावरण क चिंता केने भवन निर्माण करि रहल अछि। एहि प्रकरणक बाद विवि प्रशासन सचेत भेल आ नगर निगम कए अपन जरूरत क हवाला दैत लीज बढेबा स मना करि देलक अछि।
उल्लेखनीय अछि जे दरभंगा मे जे महराजक बस स्‍टैंड छल ओ बिहार राज्‍य पथ परिवहन निगम अधिग्रहण केने अछि आ निजी बस स्‍टैंट लेल नगर निगम आइ धरि जमीन तक उपलब्‍ध नहि करा सकल अछि। कादिराबाद बस स्टैंड क जमीन मिथिला विवि क अछि जाहि ठाम पहिने अस्‍तबल छल आ पोलो खेलबा लेल घोडा राखल जाइत छल। इ जमीन विवि प्रशासन नगर निगम कए लीज पर द रखने छल। लीज क अवधि मार्च 2012 मे खत्‍म भ रहल अछि। विवि प्रशासन एक दिस लीज बढेबा लेल तैयार नहि अछि त दोसर दिस निगम स अपन बकाया भुगतान सेहो देबा लेल कहलक अछि। एहन मे नगर निगम विवि पर होल्डिंग टैक्स मद मे 1.74 करोड़ क बकाया भुगतान क दावा करि देलक अछि। इ झगडा दूनू संस्‍था क बीच पहिनो भेल अछि। होल्डिंग टैक्स भुगतान गप उठेबा पर निगम आ विवि प्रशासन क बीच बकाया पर मामला उलझैत रहल अछि। पूर्व नगर आयुक्त विनोद कुमार झा एहि उलझल मामला मे बस स्‍टैंड खाली करबा स बचैत रहलाह। हुनक कार्यकाल मे इ तय भेल छल जे दूनू क बीच हिसाब-किताब भेलाक बाद जमीन खाली कैल जाएत। मामला शांत भेलाक बाद जतए विवि प्रशासन सेहो सुस्‍त भ गेल ओतहि निगम प्रशासन सेहो जमीन तकबा लेल कोनो प्रयास नहि केलक। बिहार क सरकारी कार्यालय क ‘एहिना चलैत रहत’ क प्रवृति कए आगू बढबैत नगर निगमक निकम्‍मा प्रशासन कए झटका तखन लागल जखन विवि प्रशासन बस स्टैंड कए खाली करबा लेल कही देलक अछि। शहर कए गाम जेका बना देनिहार दरभंगा नगर निगम प्रशासन अपन निकम्‍मापन कए नुकेबा लेल विवि प्रशासन पर आब भांति भांतिक दबाव बना रहल अछि। जिला प्रशासन क आला अधिकारी एहि मे हस्तक्षेप क रहल छथि। सवाल अछि आखिर आजादीक बाद दरभंगा नगर निगम केलक की अछि। शहरक आधारभूत ढांचा आजादी क बाद कमजोर भेल अछि। सडक सिकुरल अछि, नाला आब नाली बनि चुकल अछि। नगर निगम जखन टेंपो स्‍टैंड लेल जमीन नहि ताकि पाबि रहल अछि त आखिर कोन आधार पर मानल जाए जे ओ बस स्‍टैंड लेल जमीन ताकि लेत। विवि प्रशासनक कहब उचित अछि जे वैकल्पिक व्यवस्था जखन एतबा दिन मे करबाक कोनो प्रयास नहि भेल त आगूक गारंटी के लेत। विधि व्यवस्था क नाम पर जनहित मे बस स्टैंड लेल जमीन कहिया धरि नगर निगम कए देल जाएत। आखिर नगर निगम कहिया समर्थ होएत।

नीक वा अधलाह - ज़रूर कहू जे मोन होय

comments

1 टिप्पणी

Comments are closed.