आउ मिल कए बनाबी बिहार

nitish_2010
पटना। पटना में आयोजित समागम मे बिहार क नेता एक मंच स बिहारक तरक्की क नारा बुलंद कलथि। मुख्यमंत्री नीतीश कुमार बिहार कए 2015 तक विकसित राज्य बनेबा क भरोसा देलथि त आरजेडी सुप्रीमो लालू प्रसाद बिहार कए विशेष राज्य क दर्जा देबाक मांग केलथि। काफी दिनक बाद बिहार मे एकटा एहन समागम भेल जाहि मे विकास कए ल कए तड़प साफ नजरि आयल। एहि कार्यक्रम मे तमाम दलक नेता आ अलग-अलग क्षेत्र क हस्ती बिहार क विकास क भूमिका पर चर्चा करबाक मकसद स शामिल भेलाह। सब गोटे राज्य क विकास क लेल राजनीति बिसरी कए साझा अभियान चलेबा पर सहमति बनौलथि। इ आम राय बनल जे बिहार क विकास क लेल सबकए मिलकए लड़बाक अछि। हालांकि शिवानंद तिवारी सन किछु दलबदलु नेता एहि मुद्दा पर आरोप-प्रत्यारोप क पुरान राग अलापबा से नहि चुकलथि, मुदा आन कोनो नेता क बोली मे इ गप सामने नहि आयल। कुल मिलाकए राजनीति मे धुर विरोध आ अलग-अलग विचारधारा क बावजूद एहि मंच पर राजनीति नदारद रहल। सब इ सेहो मानलथि जे कि केंद्र सरकार बिहार क संग लगातार भेदभाव कैल जा रहल अछि। समागम मे मुख्यमंत्री नीतीश कुमार, राजद अध्यक्ष लालू प्रसाद, फिल्म अभिनेता आ सांसद शत्रुघ्न सिन्हा, कांग्रेस प्रवक्ता डॉ शकील अहमद, सांसद शिवानंद तिवारी, भाकपा माले क महासचिव दीपांकर भट्टाचार्य, प्रसिद्ध गांधीवादी चिन्तक रजी अहमद, पूर्व विदेश सचिव मुचकुंद दुबे आ डीजीपी आनंद शंकर अपन राय रखलथि।
कार्यक्रम क मुख्य वक्ता मुख्यमंत्री नीतीश कुमार कहला जे न्याय क संग विकास हुनकर लक्ष्य अछि। मुख्यमंत्री कहला जे विकास मे राज्य क सब लोक भूमिका हेबाक चाही। ओ 2015 तक बिहार कए विकसित राज्य बना देबाक दावा केलथि। ओ कहलथि बदलाव भ रहल अछि। पहिने पटना मे कतहु-कतहु लड़की साइकिल स स्कूल जाइत छल। आइ गाम-गाम मे लड़की साइकिल स स्कूल जा रहल अछि। इ पैघ बदलाव अछि।
एहि मौका पर लालू प्रसाद सेहो गंभीरता स अपन राय रखलथि। ओ बिहार कए विशेष राज्य क दर्जा देबाक मांग केलथि। हुनकर मानी त 2020 तक बिहार क दशा बदलबा लेल जरूरी अछि जे बिहार क संग भ रहल भेदभाव बंद हुए। राजद अध्यक्ष लालू प्रसाद इ कहिकए सबकए हैरत मे डालि देलथि जे केंद्र क कोनो सरकार बिहार क संग न्याय नहि केलक। ओ अपन दिस स इ पेशकश सेहो केलाह जे अगर राज्य क विकास क लेल कोनो गैर-राजनीतिक फोरम बनैत अछि त ओ पूरा ताकत स संग देबा लेल तैयार छथि।
कांग्रेस प्रवक्ता डॉ शकील अहमद कहला जे जिम्मेदार लोक अपन स्वार्थ छोड़थि आ सबहक भलाई मे अपन भलाई देखथि त राज्य क विकास संभव अछि। भाजपा सांसद शत्रुघ्न सिन्हा कहला जे सत्ता क मुख्य धर्म मानवता क विकास करब अछि। ओ एहि लेल मुख्यमंत्री नीतीश कुमार क कामकाज क तारीफ केलाह। मुदा एहि बातक चिंता सेहो जाहिर केलथि जे विकास क योजना समय पर पूरा नहि भ रहल अछि। ओ रेलमंत्रीक रूप मे लालूक सेहो प्रसंशा केलथि आ कहलथि जे लालू एकटा नीक रेलमंत्री भेलाह।
भाकपा माले क महासचिव दीपांकर भट्टाचार्य कहला जे राज्य सरकार मे भूमि सुधार लागू करबाक इच्छाशक्ति नहि अछि। ओ कहलथि जे आइ बिहार स्थित बैंक मे 24 हजार करोड़ टका जमा अछि, आखिर किया ने ओहि राशि कए बिहार मे निवेश करेबाक कोशिश भ रहल अछि। प्रसिद्ध गांधीवादी रजी अहमद कहला जे गैर बराबरी पर आधारित विकास स समाज कए कोनो लाभ नहि होयत।
पूर्व विदेश सचिव मुचकुंद दुबे कहला जे राज्य मे नक्सली समस्या क निदान जरूरी अछि। दुबे कहला जे ओ समान स्कूल आयोग क सिफारिश सौंप देने छलाह, मुदा पता नहि ओहि रिपोर्ट पर की कार्रवाई भेल।

नीक वा अधलाह - ज़रूर कहू जे मोन होय

comments