असंगठित क्षेत्र क श्रमिक कए अनुदान देनिहार पहिल राज्‍य बनल बिहार

पटना। बिहार देश क पहिल राज्य बनि गेल जतए असंगठित क्षेत्र क श्रमिक कए साइकिल, औजार आ गृह निर्माण लेल नकद पंद्रह हजार टका विशेष अनुदान क रूप मे देल जा रहल अछि। मुख्यमंत्री नीतीश कुमार बुधदिन एहि योजना क शुभारंभ केलथि। स्थानीय एसके मेमोरियल हाल मे कामगार क गृह निर्माण, औजार आ साइकिल क्रय हेतु विशेष अनुदान योजना क उद्घाटन क मौका पर ओ कहलथि जे दस लाख टका स बेसी क काज करि रहल निजी निर्माण कंपनी कए सेहो आब निबंधन अनिवार्य कैल जा रहल अछि। एहन कंपनी कए अपन कुल बजट क एक प्रतिशत कामगार कल्याण कोष कए देबाक अछि। ओहि राशि स श्रमिक क हित लेल योजना चलत। उद्घाटन समारोह मे उप मुख्यमंत्री सुशील कुमार मोदी, श्रम संसाधन मंत्री जनार्दन सिंह सिग्रीवाल आदि उपस्थित छलाह।
मुख्यमंत्री कहला जे सबस बेसी जरूरत असंगठित क्षेत्र क मजदूर क स्थिति सुधारबाक अछि, कियाकि नब्बे फीसदी स बेसी मजदूर असंगठित क्षेत्र मे छथि। योजना क चर्चा करैत ओ निर्माण क्षेत्र मे लागल कामगार स अपील केलथि जे ओ बेसी स बेसी निबंधन कराबथि आ अनुदान क लाभ लथि। ओ कहला जे आरंभ स हुनकर इ सोच रहल अछि जे दू सांझ क रोटी लेल कियो बिहार स बाहर कमेबा लेल नहि जाई। हां दौलत कमेबा लेल बाहर जरूर जेबाक चाही। मुख्यमंत्री कहला जे इ सेहो सच अछि जे मुंबई मे आकाश चूमैत इमारत बगैर बिहारी मजदूर कए नहि बनि सकैत अछि। भूटान यात्रा क दौरान हुनका इ जानकारी सेहो भेटल जे ओहि ठाम सेहो बिहारी मजदूर भवन निर्माण क काज मे जुटल छथि। मुख्यमंत्री एहि गप पर जोर देलथि जे हमरा सब कए भूकंपरोधी मकान बनेबा क तकनीक सिखबाक चाही। ओ कहला जे विकास क मतलब इ अछि जे सौ टका क आमदनी बढि कए दू सौ टका भ जाए। उप मुख्यमंत्री सुशील कुमार मोदी कहला जे कामगार कल्याण कोष मे त सरकार दिस स पैघ सेस राशि जमा भ रहल अछि किया कि 17 स 18 हजार करोड़ क निर्माण कार्य सरकारी स्तर स भ रहल अछि। श्रम मंत्री सिगी्रवाल कहला जे एहि योजना क लाभ इ होएत जे बहुत मजदूर आब मिस्त्री भ सकैत छथि किया कि औजार कीनबा लेल हुनका टका सरकार द रहल अछि।

नीक वा अधलाह - ज़रूर कहू जे मोन होय

comments