अंशुमाला कए देल गेल श्रद्धांजलि

Anshuनई दिल्ली। आय हम सब द्रवित छी, मिथिला आ मैथिली संगीत कए एकटा अपूरणीय क्षति भेल। एकटा एहन क्षति जेकर रिक्त स्थान कए कियो नहि भरि सकत। अपन सबहक चिर-परिचित गायिका अंशुमाला आब हमरा सबहक बीच नहि रहलि। मैथिली संगीत क प्रति अंशुमाला क असीम अनुराग छलैन्ह आ प्राय: सब उत्कृष्ट मैथिली मंच पर हिनका अपन गायिकी स सुधि श्रोता कए सराबोर करैत छलीह।  इ गप मणिमंजरी नाटक स पूर्व अंशुमाला लेल आयोजित श्रद्धांजलि सभा मे मैलोरंग क निर्देशक प्रकाश कहलथि। प्रकाश अंशुमाला क मैलोरंग संग जुड़ाव क चर्च करैत कहलथि जे काठक लोक क मंचन दिन हमरा अंशुमाला स भेंट भेल। ओ मैलोरंग स ततेक प्रभावित भेलथि जे मैलोरंग स जूड़ी गेलन्हि आ सदैव जुड़ल छलीह, कतेक नाटक मे पार्श्व स्वर क संग, एकटा नाटक मे अभिनय सेहो केने छलीह। हुनकर असमय अवसान हमरा सब कला प्रेमी क झंकझोरी क राखि देलक अछि। कला क क्षेत्र मे हुनकर योगदान चिर स्मरणीय रहत। प्रकाश एहि मौका पर उपस्थित दर्शक आ संस्था स अनुरोध केलथि जे ज्यों कियो संस्था वा व्यक्ति विशेष अंशुमाला क नाम स कोनो सम्मान क घोषणा करै चाहैत छथि त ओ एहि मंच स क सकैत छथि। अंशुमाला क नाम अनंत तक स्मरणीय हुए, हुनकर इ कामना अछि। एकर बाद दू टा सम्मान क घोषणा भेल। पहिल बी क्योर संस्था क कृष्ण कुमार झा अंशुमाला क नाम स साल मे १२ टा डाईलाइसिस क आॅपरेशन फ्री करबाक घोषणा केलथि। दोसर सीएमजे विश्वविद्यालय क संस्थापक सीएम झा हरेक साल 25 हजार रुपया सालाना अंशुमाला क नाम स देबाक घोषणा केलथि। एहि मौका पर ऋषि झा, कृष्ण कुमार झा, भुवन आदि अंशुमाला कए पुष्प अर्पित कए श्रद्धांजलि देलथि।

इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa

नीक वा अधलाह - ज़रूर कहू जे मोन होय

comments