‘अंतरराष्ट्रीय बिहार म्यूजियम’ क शिलान्यास

पटना। मुख्यमंत्री नीतीश कुमार मंगलदिन राजधानी मे जवाहर लाल नेहरू पथ (बेली रोड) पर ‘अंतरराष्ट्रीय बिहार म्यूजियम’ क शिलान्यास केलथि। एहि अवसर पर ओ एहि संग्रहालयक उद्घाटन क तिथि सेहो घोषित केलथि। ओ कहला जे 22 मार्च, 2015 कए इ संग्रहालय लोकार्पित होएत। ओ कहला जे बिहार दिवस क मौका पर बिहार क लोक कए इ एकटा सनेस होएत। मुख्यमंत्री कहला जे कई साल स हम एकटा सपना संजोने रही जे एकटा उत्कृष्ट कोटि क संग्रहालय हो, जे बिहार क गौरवशाली आ ऐतिहासिक विरासत कए प्रदर्शित आ संरक्षित राखि सकी। आइ इ सपना क साकार हेबाक मार्ग प्रशस्त भ गेल। बिहार संग्रहालय अंतरराष्ट्रीय मानक क अनुरुप भव्य आ सुंदर होएत, जे सामाजिक आ सांस्कृतिक क केन्द्र बनत।
ओ पटना संग्रहालय क प्रशंसा करैत कहला जे एकर ख्याति देश-दुनिया मे पसरल अछि। जाहि ठाम जेतबा ऐतिहासिक चीज राखल गेल अछि, ओहि मे स बहुत चीज क ‘डिसप्ले’ नहि भ पाबि रहल अछि। ओकरा लग समुचित स्थान नहि अछि। एहन बेशकीमती वस्तु कए प्रदर्शित करबाक तरीका आधुनिक नहि अछि। कोन चीज कहिया क अछि आओर ओकर की ऐतिहासिक महत्व अछि ओकरा ठीक ढंग स प्रदर्शित नहि कैल जा सकल अछि। एकरा देखैत हमरा एकटा नव संग्रहालय क जरूरत महसूस भेल। तखन अंतरराष्ट्रीय स्तर क संग्रहालय क निर्णय लेल गेल। पटना संग्रहालय कए सेहो सुंदर ढंग स रखरखाव कैल जाएत। ओहि मे सबटा ऐतिहासिक चीज अत्याधुनिक तरीका स राखल जाएत। मुख्यमंत्री कहला जे किछु मामला मे बिहार क इतिहास मानव सभ्यता क इतिहास अछि। एहि सब चीज क संबंध मे आजुक क युवा पीढ़ी कए जानकारी देब जरूरी अछि। ओ कहला जे नवका संग्रहालय लेल जगह क चयन ओ स्वयं किेलथि अछि। अत्याधुनिक तकनीकी पर केन्द्रित म्यूजियम क छत क ऊपर ‘वेदरिंग स्टील’ होएत, जे रंग बदलैत रहत। एकर अपन वित्तीय प्रबंधन होएत जे प्रोफेशनल ढंग स काज करत। एहि ठाम जे आउत ओ सब वाह-वाह कहत। भवन निर्माण मंत्री दामोदर रावत आओर उद्योग एवं आपदा प्रबंधन मंत्री रेणु कुशवाहा सेहो कहलथि जे बिहार संग्रहालय अपने-आप मे अदभुत होएत।

इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa

नीक वा अधलाह - ज़रूर कहू जे मोन होय

comments